एउटा प्रश्न सोध्नु छ

 

 

 

 

एउटा प्रश्न सोध्नु छ तिमीलाई, जवाफ फर्काउन सक्छौ?

थुप्रै चाहना छन् मेरा, के सबै पुर्याउन सक्छौ?

 

सुरु सुरुमा यस्तै त हो नि, सबै राम्रो लाग्छ

'हाँसो मेरो' 'दु:ख तिम्रो' होइन, सबै 'हाम्रो' लाग्छ

पछिसम्मै मसँग हुँदा यसरी नै रमाउन सक्छौ?

एउटा प्रश्न सोध्नु छ तिमीलाई, जवाफ फर्काउन सक्छौ?

 

एक होइन, धेरै पटक तिम्रो मन दुखाउँला

तिम्रो कुरै नबुझी तिमीसँग रिसाउँला

बिनाकारण नै रिसाए पनि मलाई फकाउन सक्छौ?

एउटा प्रश्न सोध्नु छ तिमीलाई, जवाफ फर्काउन सक्छौ?

 

अहिलेको निश्छल भावना दिनहरु सँगै अल्झिएला

म बदलिन्छु, तिमी बदलिन्छौ, समय बदलिएला

पछि सबै बदलिँदा पनि मलाई अपनाउन सक्छौ ?

एउटा प्रश्न सोध्नु छ तिमीलाई, जवाफ फर्काउन सक्छौ?

 

तिम्रो साथ दिने वाचा त गरुँला, तर बीच बाटोमै हात छुट्यो भने

जुनी जुनीलाई गाँसेको साइनो आधी जिवनमै टुट्यो भने

गलती मेरै भएपनी, आफुलाई सच्याउन सक्छौ?

एउटा प्रश्न सोध्नु छ तिमीलाई, जवाफ फर्काउन सक्छौ?

दिपाली झा

#DJ